2016年又過了一半了…

放學時,

靖天看見媽咪,

劈頭第一句就問: 『你點呀? 仲有無發燒呀? 睇左醫生未呀?』

早上因為病著沒有送她上學,

8個小時過去, 她竟然還惦著, 看見媽咪後第一句就是關心,

感覺窩心又貼心…. 還很感動…

身邊的那位, 也沒這樣窩心~~~~

還是女兒好… .♥ ❣ ❤ ❥ ❦ ❧ ♡ ɞ ʚ ღ ஐ ლ დ ഇ

中文考試 —

靖天: 『媽咪! 我今日作左124個字呀! 勁唔勁呀?』 (題目要求約50字)

英文考試 —

靖天: 『媽咪! 我今日作文作左72個字呀! 係咪超勁呀? 我覺得自己好勁呀!』 (題目要求30字)

忍不住掉下一句: 『其實你知唔知咩叫寫多錯多架…..?』

靖天: 『下! 點會呀!? 我寫岩曬架喎!』

媽咪:『……..』

媽咪: 『你去買啦~ 士多啤梨新地, 記得走花生呀!』

靖天: 『知道喇!』

巧巧: 『做咩叫靖天加花生呀?』

爸B: 『唔係加花生呀~ 係走花生呀!』

巧巧: 『哦!! 花生識走架咩?』

媽咪: 『唔係o個個走呀~~ 係走~~花~~生~~呀!!』
 

巧巧: 『哦~~~!!! 有酒既花生!!』

爸B: 『巧! 請問你講野, 可唔可以唔好咁爛? 實在係太爛喇!!』

巧巧: 『…… ????? ……. 』

矇矇瓏瓏睡至清晨,

忽然聞到陣陣的酸味…..

想著想著, 不對!!! 應該是燒焦了什麼的味道!!

叫醒枕邊人, 他一聞, 已經知道出事了!!!

找著找著, 立即找到… 是從他的電腦發出來的!

近600度近視的她, 沒太看得清環境 (未戴眼鏡)….

直至關掉所有電源後,

他問: 『係咪出面o的霧吹左入黎? 間房咁濛既?』

她才仔細看清楚… 『作死你咩!! 煙黎架!!』 (然後二人大笑)

幾驚……

巧巧生日的第一個活動是走火警……… @.@

巧巧: 『點解我同靖天唔係雙胞胎既?』

靖天: 『下?! 我同你差3年, 點都做唔到雙胞胎架喎!』

巧巧: 『點解我O係天堂顧住玩, 唔早O的投胎去媽咪個肚個度丫? 媽咪, 點解我要O係天堂顧住玩丫?』

媽咪: 『eerr…… 你要問下你自己喎!』

巧巧: 『(自言自語) 乜天堂真係咁多野玩咩? 點解我唔早o的出世丫? 點解我要掛住玩丫?』

已經無人理睬她~~~~~

巧巧: 『我真係好想同你做雙胞胎架, 靖天~~ (好遺憾的樣子)』

靖天:『唉…. 咁點解你唔早o的投胎丫? (好無奈的表情)』

巧巧: 『我都唔知點解呀, 唉…… (好失望的語氣)』

這個關於生命教育既話題, 也實在太複雜, 太哲學了吧?!

看著巧巧很認真的在想為何從前「在天堂掛住玩唔投胎」, 真係唔知好嬲定好笑~~~

傳說中, 呢個世界有種「凍」, 叫「你阿媽覺得你凍」…..

早上為女兒打點衣物準備上學去~

穿好校服大褸, 見她還是有點冷的, 便著她戴手襪, 還給她一個暖包,

再叮囑她, 回到學校要這樣那樣…

20分鐘後到達校門,

她高興的說再見, 卻發現, 手襪和暖包, 全部都掉在車裡…

媽咪: 『你對手襪同埋暖包呀!~~』

靖天:『 (想了半秒) 我依家唔凍喇! 唔洗帶架喇!』

媽咪: 『 喂…. (都未喂完)…』

靖天: 『媽咪, BYE-BYE!』

………… 就高高興興上學去~~~

這才想起, 呢個世界有種「凍」, 叫「你阿媽覺得你凍」…..

意思大概如此吧……..

PS: 你今晚返黎發燒你就知死!!!!!!!

媽咪: 『今日都係公公湊, 我今晚要返工~』

靖天: 『下! 你病緊喎~~』

媽咪: 『都要返~』

兩姐妹: 『下!!!!』

隔了一會…..

巧巧: 『爸B… 點解媽咪病左都要返工既?』

爸B: 『因為工作就係咁喇~』

靖天: 『係呀! 所以媽咪都要返工搵錢架, 唔係得爸B架~』(氣死爸B咯!)

看似無知的想法 (生病 = 不用上班),

但想著又覺窩心….

很喜歡, 女兒疼自己的感覺…. (如果在行為上都可以乖巧一點更佳)

爸B: "快o的搽埋cream收好o的野啦!"

靖天: "得喇! 做完一樣做一樣丫麻!"

爸B: "快o的得唔得呀?"

靖天: "你可唔可以一次過做幾樣野丫? 唔得丫麻!"

爸B: "我得喎!"

靖天: "咁你可唔可以一路食薯片, 一路食雪糕, 一路開門丫? 唔得丫麻!"

爸B: "可以喎! 個口咬住塊薯片, 隻手攞住杯雪糕, 一隻手開門, 咪得囉!"

靖天: "……… ………. 費事同你講野呀!!!!"

爸B: "哈!! 你唔夠我拗架喇~~~"

靖天: "吼………"

靖天雖有轉數, 卻敵不過鐵嘴爸B….

巧巧: 『我想快O的到聽日呀!』

靖天: 『我知啦~』

巧巧: 『你知點解咩?』

靖天: 『我知, 你聽日生日麻!』

巧巧: 『嘻! 岩喇!』

靖天姐姐從沒有如此期待過生日,

倒是巧巧…. 簡直是熱切期待~~~

自駕中。。。

靖天: “爸B，要幾耐先到架?”

爸B: “27分鐘左右。”

靖天: “即係幾耐啫?”

媽咪: “屋企去荔枝角咁上下，唔好再問喇~”

靖天: “哦!! 出九龍~~ 爸B，你講清楚啲吖嘛!!!”

爸B: “…….”

對孩子說話，得用孩子的語言文化~

怎麼咱家爸B還不懂這道理呢~~

學校午飯時, 巧巧被嬸嬸手上的熱煲 (因為要舀湯給孩子) 不小心弄到了~

巧巧感到痛, 卻一直沒有告訴老師, 直至下午茶後 (已經是3小時後的事), 另一位同學跟老師說中午時巧巧受傷了…

老師大為緊張, 跟巧巧問個詳細, 但最後巧巧也只是「哦」、「好似有」…. 的回答….

接過放學, 在車上問巧巧為什麼沒有告訴老師,

她竟然說: 『因為我真係太肚餓… 我想食左飯先~~』

媽咪忍笑: 『你諗住食完飯先講… 但跟住就唔記得左?』

巧巧: 『係呀~~~』

連痛都不理了, 連有沒有受傷都不顧了, 總之就要「食飯先」~~~

巧巧… 您也實在太饞嘴了吧?! 哈哈哈哈~~~

不知在哪看到別個名星的孩子….

爸B:『你睇下…. 幾醜!』

媽咪: 『乜你咁架!! 細個唔洗咁靚架, 大個慢慢會靚架麻!』

巧巧: 『乜係架咩?』

媽咪: 『係架…. 細個唔洗太靚, 大個慢慢就會靚架喇… 你無聽過"醜小鴨"咩?』

巧巧: 『 (若有所思兩秒) 嗯!!! 咁我依家都係唔好扮靚住喇…….』

全家爆笑!!!!

巧巧的頭腦可真清醒啊!!! WAKAKAKA

** 兩姐妹。M巾的使用 **

準備拿衣服去洗澡,

巧巧看見後就很貼心的幫媽咪拿內褲,

然後….. 還…… 拿了一塊「巾」準備幫媽咪貼好… (有點嘔心吧, 哈)

媽咪: 『巧巧!! 即係其實我今日唔需要呢個…..』

巧巧: 『下?! 咁你要咩呀?』

媽咪: 『我要平時O個個就可以了…』

巧巧: 『但係我搣開左喇喎!』 (不能接受的樣子)

媽咪: 『唔….(裝認真的) 一係你問下家姐要唔要啦~』

巧巧: 『靖天~~ 你要唔要用呢個「巾」呀?』

靖天: 『 (碰巧靖天剛剛洗完澡, 包著毛巾回房間) 嗄!!! err… 好啦, 我都想試下用~』 (很認真的回應, 樣子表示十分想試但又有點尷尬)

<幾乎要爆笑了, 立即去開花生!!>

巧巧: 『拿! 你貼丫!』

靖天: 『(看了一眼, 瞪起眼睛) 嘩! 咁大塊架!? 我條底褲仔~~黎咋喎…. 算啦, 我都係唔用喇, 唔該巧巧~』

巧巧: 『嗄! 咁我依家點呀?』 (手裡仍然拿著一塊被嫌棄的「巾」)

隔了幾秒見巧巧還是不知所措…

媽咪打圓場: 『你掉左佢啦~~ 下次咪玩我O的野喇~ 好貴架!』

** 母親節禮物 (一) **

媽咪:『星期日母親節喎!』

靖天: 『係?! 咁我要送禮物俾你呀~ 你想要咩呀?

媽咪: 『我想要"乖"…. 得唔得丫?』

靖天: 『乜你要呢O的野架…. 我想送"一樣野"俾你呀~~』

媽咪: 『我咩都唔想要… 淨係想要"乖"….』

靖天: 『哎呀! 乜你咁架!!!』

然後, 經過「六十八」 —–

靖天: 『 (好大聲的) 呀!! 媽咪!! 我送胸圍俾你好無呀?』

媽咪: 『你唔好叫我, 我唔識你….@.@….』(你睇我唔到! 你睇我唔到!)

靖天: 『 (拖住巧巧揀胸圍, 然後繼續大聲嗌) 媽咪!!! 呢個好無呀? 你著咩"嘥屎"架? 75? 80? 點解有寫A-B-C既? 媽咪~~~!!!!』

媽咪: 『 (早走早著) 唉… 我唔睇喇…..』

靖天: 『媽咪!!! 揀左先啦!!! 媽咪~~!!!』

** 母親節禮物 (二) **

回到ZXRX跟爸B會合 —-

靖天: 『爸B~ 原來星期日母親節呀~』

爸B: 『啊?! 咁點呀?』

靖天: 『我想送禮物俾媽咪… 不如唔好俾佢知喎!』 (媽咪就站在兩個身位的位置看衣服, 聽得一清二楚)

爸B:『咁你想送咩丫?』

靖天: 『嗯…. 我想送花呀~~ 不過我唔夠錢….』

爸B:『咁呀~ 咁我幫你俾啦~』

靖天:『(思考了一會) 唔好! 我出5蚊啦~ 其餘你幫我出啦~』

爸B:『(忍笑中) err…. 好啦, 咁你出5蚊, 我幫你墊底啦~ 咁你想送咩色既花呀?』

靖天: 『白色啦~』

爸B:『嗄! 白色花拜山送俾死人架喎!』

靖天: 『嗄!?! 係架咩~~?? 咁… 咁送藍色啦, 媽咪鍾意藍色~~』

爸B:『好啦, 咁去搵下有無藍色既花啦~』

靖天:『 (大大聲) 你記得千祈唔好講俾媽咪知喎!! 』

爸B:『知喇~~』

媽咪其實一直拖著爸B的手….. 唔洗講都知啦!

仲有呀!!! 唔係用幾多"蚊"去買花架!!! 係用幾多"百元"去買架!!!

唉…. 真係唔知佢蠢定笨…….

下午4時,

巧巧發現爸B的上班皮鞋還在家,

巧巧: 『爸B對鞋O係屋企既?』

然後咚咚咚的立即跑到床上找爸爸….

巧巧: 『點解無既?!』

那一刻的巧巧, 實在有點可愛….

媽咪: 『今日星期六, 你爸B唔洗著皮鞋返工架~~!!! 你係咪失憶呀?』

巧巧恍然大悟…..

似乎忽然想起, 爸B今天原來是「秘撈」去了~~

故事背景:
李XX (女同學, 跟女兒心儀同一位男同學)
胡XX (男同學, 靖天暗戀對象)
靖天: 『媽咪, 你知唔知今日李XX(女)叫胡XX (男)做咩呀?』
媽咪:『胡XX囉!』
靖天: 『梗係唔係啦! 佢叫胡XX做"胡生"呀!』
媽咪: 『哦! 咁…… 跟住呢?』
靖天: 『佢洗唔洗叫得咁親切呀?』
媽咪: 『err… 咁你又叫佢做"胡生"囉~ 你都可以架!』
靖天:『(嬲嬲豬的樣子) 我…. 真係叫唔出呀!』
媽咪: 『咁人地點叫人地既事啫~ 你咁忟做咩啫~』
靖天: 『咁係丫麻! 佢唔係第一次架喇! 我唔知點解覺得好嬲同好唔開心~』
媽咪: 『因為你妒忌囉~ 又唔抵得囉~ 有無估錯你呀?』
靖天: 『(雙眼通紅) 嗯….. 』
媽咪: 『你唔抵得李XX 好似當左胡XX係男朋友咁丫麻~ 你又做唔到咁樣, 跟住你咪感到生氣同沮喪囉~ 因為你都暗戀胡XX丫麻! 哈~~』
靖天: 『我點解會咁…….?』
媽咪: 『先得8歲, 急咩啫? 你俾心機裝備好自己, 到時大把男仔鍾意你啦, 洗為左呢個男仔唔開心咩~ 傻既!! 講真, 我真心唔覺得呢個男仔有幾好囉!!! (下刪……….) 』
女兒主動落搭, 媽咪也抓緊機會給她洗洗腦, 教育教育一下~~
已經暗戀了班裡的男生快2年, 又不是什麼新鮮蘿白, 真不知女兒的長情從哪裡來的~~
也好…. 專一總比花心 (水性楊花) 的好…..
慢慢長大, 就知道這世界的森林有多大了! XDXDXDXDXD

《粗口, 慎看!》
靖天: 『媽咪… 咩叫"WHAT THE 花"呀?』
媽咪: 『咩花?』
靖天: 『"WHAT THE 花"呀~~~? 』
媽咪: 『唔知你乜花~~』
靖天: 『粗口黎架…. 學校有同學仔講, 我好想知點解~』
媽咪: 『WHAT THE "FUCK"呀!!!???』
靖天: 『係呀! "FUCK"呀! 咁點解呀?』
媽咪: 『err….. 我唔知…. 你問爸B啦~~~』
靖天: 『我問過喇, 佢唔肯講呀~~』
媽咪: 『 (看著女兒bling-bling的眼神) "x"咁解~』
靖天: 『咁咩叫"x"呀?』
媽咪: 『呢個真係唔識答~~』
靖天:『你講啦~~ 你肯定知架!』
媽咪: 『err……… 即係….. "仆街"咁解~~ 所以呢個粗口勁嚴重, 一講即死! 千祈唔好再講! 唔好話俾人知你識~~』
靖天: 『嘩!! 我以為痴線, 白痴咁解咋~~』
媽咪: 『嚴重好多~ 千祈唔好講, o係學校講一定踢出校的! SHU!!!』
靖天: 『哦~~! 』
事後跟爸B談起, 大家都覺得.. 那個"F"字, 實在難以解釋意思….
知道是極嚴重的粗口便好了~ 過多幾年, 她自然會發現我們騙了她的, 哈!
PS: 一直不想讓靖天抱著太多的問號成長…. 既然可以解答她, 就為她解說幾句~
總比在學校問同學, 跟朋友胡里胡塗的討論好….

(494)

Comments

comments