記錄的點滴好像越來越小….
有點失落啊!!!

貓痴日記 (第一回)
靖天: 「如果爸B有錢O的就好啦~~」
媽咪: 「點解呀?」
靖天: 「如果佢有錢O的, 咁佢咪會買多間屋囉~」
(媽咪心想: 衰女, 咁快想個老豆買樓俾自己?!)
媽咪: 「咁買多間屋做咩?」
靖天: 「咁佢有錢買多間屋, 佢咪可以自己搬出去, 我地咪可以養貓貓囉~」
媽咪: 「…………..」

兩姐妹在玩具….
巧巧: 「爸B咁耐都未返既?」
靖天: 「出JOB!」
巧巧:「下!! 咁幾時返架?」
靖天: 「好夜…」
巧巧:「下!! 咁佢有無著褸架?」
靖天: 「我唔知道……」
巧巧: 「我驚佢發燒丫麻…」
靖天: 「……..」

走進超市, 自自然的買了幾根葱….
媽咪納悶: 「我做咩要買葱呢? 但我記得我係一定要架喎…」
心想, 算吧! 買回家再算~~~
付錢後, 離開超市,
靖天忽然問: 「媽咪! 你條魚呢?」
媽咪: 「我無買魚呀!」
靖天: 「唔係喎~~ 你買左葱, 一定有條魚架喎~」
這才恍然大悟: 「呀!!! 我記得喇! 我今晚要蒸魚, 所以要買怱!!」
靖天: 「係囉! 我見到你買葱, 咁即係今晚一定有魚食啦! 但係條魚呢?」
媽咪: 「犀利喎! 條魚我今朝買左喇! 唔怪得我頭先要去買葱啦~!」
靖天: 沾沾自喜中………..
這位大小姐, 不"失靈"時, 其實絕對是一位好幫手!

《反叛期。初兆》
考試進行中, 一如過去用的方法, 抽出一些作業練習讓靖天重溫一下~
60分鐘後回到桌面上, 打算批改一下便讓她耍樂去 (心還盤算, 晚飯後可以帶她去吃甜品!),
卻嚇然發現, 工作紙只完成了一頁,
而第2頁卻貼上一張橙色便條紙, 寫著: 「練習太多了! 我不想做。」
此時, 看見房間的I-PAD亮著還暫停在"多啦A夢"畫面中,
大概也不難猜想, 剛才的60分鐘, 她做過什麼?!
…………….
…………….
…………….
那一刻, 七孔已生煙, 心亦隱隱作痛 …..
其實….
"皇帝"唔急, "太監"又何須替她急?!

媽咪: 「點解今日咁清醒既? (練習)全部岩曬…. 你聽日考試都會咁架呵?」
靖天: 「梗係會啦~」
媽咪: 「你早兩日係咁咪乜事都無囉! 係要激到我著曬火既~!」
靖天: 「因為我俾你打丫麻~ 我俾你打完第2日我就會好叻好正常架喇~」
媽咪: 「拿!!! 大家 (望住爸B和巧巧) 聽到啦!!! 原來真係有人五行欠打!!」
靖天: 「哈! 哈! 哈! 哈! 」

OK!!! 您講到咁,
我唯有淘多六箱虅條繼續招待你!!!

!! 長篇 !!

~~~ 小二, 靖天要「情」苦惱了~~~

靖天上年開始, 「暗戀」上一位同班男生~~
媽咪上年從她口中得知, 她是因為人家長得帥, 又斯文, 又喜歡閱讀, 就喜歡上了…
一直相安無事, 至今年, 小妮子跟這男生坐在附近, 聊的機會也多了~~~
然後, 有一天…
靖天: 『我以後都唔可以同B君玩喇~』
媽咪: 『下! 點解呀?』
靖天: 『因為C女生話A女生鍾意左B君, 所以我唔可以再同B君玩喇…』
媽咪: 『下! 有咩關係呀? 咁朋友仔一齊玩咋麻~』
靖天: 『A女生寫左封信俾B君, 話鍾意佢… 跟住又寫左張紙仔俾我, 叫我唔好同B君玩… 我以後都無得鍾意佢喇!』 (這時, 靖天已經雙眼通紅)
媽咪: 『唔關事架喎~~』
靖天: 『咁佢又同鍾意B, 我又鍾意B, 點可以2個女仔都鍾意一個男仔丫! 咁我依家無得同B玩架喇~』 (說著說著, 終於哭了出來)
媽咪: 『咪住先….. 你地有無問下B君, 佢鍾意邊個先? 而且…. 無人話唔可以2個女仔鍾意同一個男仔架喎~~ 重點係, 個男仔點諗先?』
靖天: 『 (立即收起眼淚) 乜可以2個鍾意埋同一個男仔架咩?』
媽咪: 『拍拖結婚生仔呢O的就唔可以….. 咁你地做朋友仔咋麻, 點解唔可以先? B君有無話同你絕交丫?』
靖天: 『咁又無…….』
媽咪: 『咁咪係囉… 難道你想同佢拍拖?』
靖天: 『梗係唔係啦! 我想同佢做好朋友咋麻~~』
媽咪: 『咪係囉…… 做朋友當然可以幾個小朋友一齊架啦~ 你咪傻啦……..』
~ 下刪更多討論 ~

真係好想講….. 誰家男生娶左咱家大小姐, 實在係三生有幸~
未見過蠢成咁既女仔囉~~~~!! 哈!)))
再過幾年, 大概都預見到她會怎樣"為仔死為仔亡"咯~~~ 善哉!!

媽咪: 『你地班入面邊個最叻架?』
巧巧:『我囉!』
媽咪: 『咁… 你地班邊個最乖架?』
巧巧:『都係我囉～仲有XX 同埋YY既~』
媽咪: 『咁你O個班邊個最醒目先?』
巧巧: 『咪我囉~』
媽咪:『巧巧… 其實爸B媽咪係唔容許小朋友咁自負, 咁驕傲架… 你明唔明呀?』
巧巧: 『我明呀!』
媽咪: 『咁…. 你再答一次, 你o個班邊個小朋友最叻最醒目丫?』
巧巧: 『都係我喎!』
媽咪: 『巧!! 巧!!!!……』
巧巧: 『我講認真架! 我唔係同你講笑!!』
爸B媽咪立即奉腹大笑!!!
幾時開始, 咱家小女兒變得如此……. 幽默呢?~~~

(126)

Comments

comments