2014年的上半年, 記紀太少~~
這些甜話, 變得更珍貴…..

晚上, 爸B無聊看資料~~~

靖天: 『呢度邊度黎架?』
爸B: 『新加坡囉! O個度好好架, 勁乾淨, 無垃圾架!』

然後, 今天上學前~~~

靖天: 『爸B, 我想搬呀! 我想搬去新加呀, 因為O個度無垃圾, 好開心呀!』
爸B: 『但係O個度無野玩架喎, 無公園無遊樂場, 個個淨係讀書返學架咋!』
靖天: 『咁都有小朋友架麻~ 我同小朋友玩咪得囉~』
爸B: 『O的小朋友個個都係讀書, 讀書同埋讀書架咋, 無人玩架!』
靖天: 『咁我唔搬LU~ 不如搬去台灣啦, 多野玩O的, 哈哈!』

跟靖天一起學習「我是誰」…

對錯題: 「爸爸和哥哥的姓氏都一樣。」
靖天: 『我都無哥哥既!』
媽咪: 『咁你當係妹妹….. 妹妹姓咩丫?』
靖天: 『姓”巧”囉!』
媽咪: 『..(滴汗)…巧巧全名係咩先?』
靖天: 『X巧藍囉!』
媽咪: 『咁即係姓咩呀?』

巧巧作病, 媽咪要餵藥…

哭得死去活來的巧B,

找上千萬個原因推搪不吃藥: 「我要畫畫….. 我要XXX, 我要YYY, 我要ZZZ…」
媽咪: 『好好好~~ 你快O的食啦, 好無?』
巧巧: 『我好快架喇!! 嗚嗚嗚~~ 嗚嗚嗚~~~』

實在是…… 忍唔住要爆笑~~~ (沒有拍下實在是遺憾!!!)

爸B在幫巧巧洗澡, 在清潔那話兒,

巧巧: 『好痛呀! 好痛~』
爸B: 『你梗係啦, 去完VV又唔抹!!』
巧巧: 『無紙巾呀~~~』
爸B: 『點會無紙巾 (指住), 你曳就曳丫!』
巧巧: 『我無呀!!! 好痛呀~~ 嗚嗚~~~』

孩子要找藉口, 真係乜都講得出~~~

因為一時失神, 泊車時弄了好一陣子才泊到,

靖天: 『媽咪呀! 我想問呢, 你以前個車牌呢, 係點考返黎架?』
媽咪: 『 (心一沉) 咩料呀~~~~!!（吼）』
靖天: 『點解呢… 你泊車泊得咁差既?! 考車牌唔係要考泊位架咩?』
媽咪: 『…. … … 』

早上乘車上學中…

巧巧: 『爸B, 幾時帶”GEE”去旅行呀?』
爸B: 『幾時坐飛機去旅行?』
巧巧: 『唔係…』
靖天: 『爸B, 你唔好嘈~ 巧巧話… 幾時帶埋個喼去旅行呀!』
巧巧: 『係呀!』

知巧者, 莫若姊也!~~~

游水前,

阿SIR: 『靖天, 今年咩年?』
靖天: 『下?!』
阿SIR: 『知唔知今年係咩年呀?』
靖天: 『新年!!!』
阿SIR: 『 (汗) 今年係2014年…..』

媽咪在旁聽到, 又是笑得人仰馬翻!
這個GAG, 真的爛得好淒涼!!!

離開遊樂場,

一位小男生不停大叫: 『BYE-BYE!! 女神, BYE-BYE!! 下次再玩過呀, 女神~~』
媽咪: 『靖天… 個男仔叫邊個呀?』
靖天: 『叫我囉!』
媽咪: 『下?! 佢叫你咩呀?』
靖天: 『 (尷尷尬尬的) 女神囉!』
媽咪: 『佢做咩叫你女神呀?』
靖天: 『因為我地玩緊, 女神可以賜俾佢陽光, 咁咪叫我女神囉!』

年初一, 在遊樂場被男孩「掃背攬腰」;
年初三, 在遊樂場被男孩高叫「女神」;
家陣咩事呢?! …… @.@

靖天: 『巧巧, 送俾你架 (生日咭), 生日快樂!』
巧巧: 『嘩! 多謝呀!』

然後… 由昨天晚上, 到今天早上,
巧巧不停問左同一句: 『我個生日會呢?! 幾時呀?』

家姐仔…. 今次真係多得你唔少咯!!!

得悉星期五不用上興趣班, 靖天問原因…

媽咪: 『因為情人節囉! 我約左爸B出街拍拖呀~』
靖天: 『… … … 即係我要留O係屋企啦?!』
媽咪: 『咁你都可以約你情人出街既….』
靖天: 『… … … 我都無男朋友, 約咩O者?!』
爸B: 『 (在廳外大叫進房) 我咪你情人囉! 我陪你咪得囉!』
靖天: 『… … … 我唔要! 哇)) 哇)) 哇)) (嚎哭起來)』

爸B媽咪終忍不住起哄大笑!!
這個哭, 是因為沒有情人? 還是爸B說要當她情人呢?! 呵呵!!!!

早上, 準備下午拍拖去

老婆: 『我咁樣著好無呀? 定著返條裙同你出街好呀?』
老公: 『哎呀, 是但啦, 同你出去行下咋麻… 』
靖天: 『 (忽然插嘴) 你地出去拍拖麻, 著靚O的好O的~~』
爸B: 『HAHAHA 咁你聽下個女話啦嗄!』
媽咪: 『 吼……』

靖天姐姐上台領獎 (其實只是拿回上年的証書),

巧巧看見, 大叫: 『我個靖天呀! 呢個係我靖天家家呀!!』

拿過証書回到座位, 巧巧大力且緊緊的攬抱,

巧巧: 『靖天!! 好叻呀!』

兩姐妹相擁而笑~~~

也許, 巧巧是想「恭喜」家姐一番吧, 只是還不懂這詞語!
那刻, 十分感動! 不是因為大女兒得獎, 而是兩姐妹的感情, 如此的深厚!
靖天姐姐的高興事, 當妹妹的也百分支持, 這是當父母的, 特別希望看見~~~!!

媽咪:「唔好要巧巧好無?」
靖天:「好呀！」
媽咪:「但係第日我死左，就得反你一個孤令令喎！」
靖天:「我有你咪得囉！」
媽咪:「我話我死左嗰時呀; 你自己一個，無人錫你架喇！」
靖天:「如果你死左，我咪攞住你塊（神主）牌返屋企囉，我去邊都帶住你（塊牌）架！咁咪可以永遠同你一齊囉！」

媽咪被逗得哈哈大笑！ 曾幾何時，自己都有跟靖天婆婆講過一樣的話。。。

晚飯, 兩姐妹一人一枝益力多…

巧巧一早已喝光自己那枝, 卻忽然又看見她拿起來喝,
媽咪: 『巧巧, 你唔係飲曬喇咩?』
巧巧: 『(若無其事) 我幫家姐飲埋佢呀!』
靖天才發現, 妹妹拿了自己那枝來喝, 氣得呱呱叫~~~

爸B媽咪爆笑: 『咁都得?』

巧巧陰陰咀的笑,
還要重覆一次: 『我幫家姐飲丫麻!』

家姐氣得七孔生煙, 妹妹則洋洋得意…

巧巧: 『爸B!! 你返黎喇?! 我痾緊臭臭呀!』
爸B: 『哦….. !! 咁你慢慢啦!』
巧巧: 『我痾緊臭臭呀, 我痾臭臭就好叻架喇!』
爸B: 『哦…. (汗) 』
巧巧: 『喂~~唔好沖我O的臭臭呀嗄!』
爸B: 『 (爆笑) 下!! 唔沖唔得架喎!』
巧巧: 『我O的臭臭好有用架! 我痾臭臭好叻架!』
爸B: 『(無言)….』

早上, 爸B要巧巧穿外套上學, 巧巧不從~~

爸B: 『出面落雨呀, 凍左好多呀, 你著左返到學校, 熱先除啦, 好無?』
巧巧: 『嗯..』

穿好校服, 走到窗外,

大聲喊: 『爸B! 都無落雨!! 無落雨喎!』
爸B: 『你企上窗台望下先啦, 街既地下濕架~』
巧巧: 『 (看見街道都濕了) 有人洗地咋麻! 都無落雨!』
爸B: 『有人洗成條街洗到濕曬?! (暈)』

好可怕的女兒….
跟靖天姐姐的「言聽計從」真的差太遠了!

昨晚被蚊子咬到腳跟和腳眼 (近10撻),

今天下午已不能自行走路 (巧巧說好痛好痛) 剛剛…

巧巧: 『我(係)病童今晚訓呢度 (床尾)呀~~』

然後…

巧巧: 『爸B, 你餵我食中藥呀! 我(係)病童呀!』

這個復活節假期, 夠折磨咱家女兒咯!

問靖天，He, She,It的用法。。。

靖天：「如果男仔就用He, 女仔就用She, 死物就用It。」
媽咪：「咁動物呢？狗仔，貓仔，用咩呢？」
靖天：「咁如果隻狗係男仔就用He, 女仔咪用She囉！」
媽咪：「（忍笑中）但係我點知佢係男仔定女仔呢？」
靖天：「可以問下佢主人架嘛！」

知道要用「It」, 靖天難以接受，在媽咪使勁的解釋後，終於明白且接受了！ 教導的過程，實在好笑！

很喜歡靖天這個He She It 的解說，太有「人性」！

家中出現小昆蟲….

巧巧: 『我唔驚”烏蛾”既!』
爸B: 『咩烏蛾呀~~!!』
巧巧: 『我去旅行酒店都有”烏蛾”架! 不過我唔驚既!』

全家爆笑!!

一秒前, 已經敎她, 是「飛蛾」, 不是「烏蛾」, 她還是要說「烏蛾」…

爸B終於了解, 女兒原來是想說「烏蠅」和「飛蛾」!!!

這樣的”簡稱”, 虧女兒想得到, 哈!

晚上, 跟巧巧落街到超市買東西, 就只有巧巧願意陪伴媽咪…

等電梯時，

媽咪: 『你對我真係好, 肯陪我落街!』
巧巧: 『梗係啦! 我愛你架麻!』 (極滿足的樣子)
媽咪: 『多謝你呀~』
巧巧: 『嗯!』

隔了一會…

巧巧: 『咁你都好鍾意爸B架麻! 佢係你爸B丫麻, 係咪?』
媽咪: 『老公… 唔係爸B~~』
巧巧: 『咁你係咪都鍾意爸B丫? 你爸B呀~~』
媽咪:『都話老公。。。』

這幾天, 他與她狠狠的吵了一場, 沒讓兩姐妹看到知道, 只是盡量不提不說不理 , 經女兒這一說, 媽咪心虛了! 看著她的眼神, 好像在… 是知道?! 或感受到? 甚至來做「和事妹」?! 這小女兒, 真的很不可思議~~~

早上, 巧巧換校服, 挑了兩條小底底出來…

巧巧: 「媽咪, 著邊度好呀?」
媽咪: 「呢條 (指住粉紅) 啦!」
巧巧: 「呢條?! (另一條彩虹色)」
媽咪: 「…. 係!」 (一句就知女兒想怎樣!)

巧巧: 「爸B~~ 邊度好呀?」
爸B: 「呢條! (指住粉紅)」
巧巧: 「呢條? (又係彩虹色)」
爸B: 「err…係啦係啦!」

然後, 巧巧滿足的穿上那條彩虹色的小底底~~~

巧B呀~~~ 你自己都心有所屬, 何苦要問呢?! 好港女呀~~~!!!!

回家後, 媽咪仍埋首工作…

巧巧: 『媽咪… 我想睇MINNIE呀~』
媽咪: 『..』
巧巧: 『媽咪… 你唔錫我喇?』
媽咪: 『做咩呀~~ ?』
巧巧: 『你頭先唔應我, 係咪唔錫我喇?』
媽咪: 『哎呀! 今日好忙麻~ 邊有唔錫你O者! 我幫你”禁”啦~』

唔應您O者, 唔洗講到「唔錫您」咁嚴重呀?!

咱家的小女兒, 嘴巴確實十分「青出於藍」!!! @.@

今晚, 女兒跟著爸B媽咪慶祝她們的紀念日…

在CAFE, 爸B「引導」初嚐酒類~~

喝了兩大口ROSE WINE, 靖天雙眼泛紅, 臉又帶粉粉的…

不到15分鐘, 便開始語無倫次~~

回家後已忘記她說了什麼…

總之我們講一句, 佢就駁十句, 而且字字鏗鏘!!

原來, 女兒飲醉酒是這樣子… 太爆笑!!!

後記: 回家後, 忽然哭起來, 叫我們千萬不要告訴別人, 她曾喝酒, 否則被老師知道就會受責罰…

哈!! 真係好搞笑!!!

媽咪: 『聽日你遲少少返學, 我同你去小學註冊, 順便造埋校服~』
靖天: 『下! 做校服?』
媽咪: 『係呀… 唔知有無得即刻攞呢~』
靖天: 『下!!! 我自己做呀? 點做呀?』 (然後雙手伸直)
媽咪: 『(呆了兩秒, 會過意來)
媽咪: 『唔係”做”呀, 係.. “訂”呀~ 唔洗自己”做”架!』
靖天: 『哦…』

吹啤~~~
這女兒這大半年對書本以至我們生活上的一字一詞都特別敏感!

落車後,

靖天: 『 媽咪, 我可唔可以今晚3點起身呀?』
媽咪: 『下! 無端端起身做咩呀?』
靖天: 『我想睇波呀, 今晚o個場凌晨3點開波呀~』
媽咪: 『…. 唔好玩啦, 女~~~ 我唔會陪你架!! 你叫你老豆啦!』
靖天: 『哈哈哈哈~~~』

某天, 巧巧依偎在媽咪身上…

巧巧: 『媽咪~~ 你係咪大”咪咪”呀?』
媽咪: 『下?!』
巧巧: 『你呢度好大呀… 唔可以摸架係咪呀?
『 媽咪: 『 (難為情的) 好大咩?』
巧巧: 『嗯! 大咪咪呀! 我好鍾意”唉”住你架!』
媽咪: 『咔咔咔咔~~~~!!! 你係第一個話我大咪咪架, 我愛死你呀!』
巧巧: 『我都好愛你呀~~』

連她爸也說不出口老婆是”大咪咪”, 這巧B竟然~~~
沒關係, 當媽的一定照單全收!! WAKAKAKA

(148)

Comments

comments