10月初靖天終於攞左回鄉証, 咁梗係唔好嘥左佢…..

放大假既第2天, 就決定叫埋靖天婆婆, 靖天公公同埋傻姨 (即係我細妹) 一齊上深圳行下…..

自來我行我素既我, 生完靖天後似乎呢份執著仲嚴重左…. 网上聽好多傳聞話中國點差點衰, 但係我又唔理解, 既然自己攞住特區護照, 係中國既子民 (今時今日唔會仲有人攞住BNO話自己係英國 (海外)居民麻?????)  點解唔俾個機會自己女兒返去所謂既"大陸", 睇下, 望我…. 等佢感受下係先進, 定落後? 係污煙章氣? 定空氣清新?!

可以咁講, 成年無上去, 深圳似乎變化不大….. 或者係因為閒日上去, 地方比我地香港既旺角, 尖沙咀, 銅鑼灣更少人, 更舒服….. 唯一最唔好係, 國內既人民對眼係生o係頭頂上, 永遠都橫衝直撞, 撞到你係等閒事….. 既然呢個係佢地既"文化", 當然我會入鄉隨俗… (即係撞返佢地轉頭…….KAKAKAKKAKA)

我們仨準備出發喇….. 真好, 有傻姨幫我地影相…….

到左火車站喇….. 自深圳出發!!!!

上到火車, 靖天相當興奮…..

靖天: 爸b你抱到我好痛呀…….

落車喇… 巧緊張啊!!!!

因為第一次同靖天一齊過關, 無得行E道…. 搞到手忙腳亂….

過左香港關口喇……

因為係平日仲要中午時間, 深圳關口極少人, 唔洗5分鐘就過左關…. 不過過兩個關都俾主任問我: BB叫乜名…….. 係喎, 都唔記得, 呢個係指定問題, 凡有bb / 小朋友過關, 都必定要問呢條問題…… 咁多年黎都無變….

出左深圳關口…. 我地去坐地鐵喇!!!!

靖天與公公….. 在羅湖地鐵站……

靖天: 坐咁耐車, 都未到既…..

落到東門, 傻姨話要去鼎泰豐食lunch喎……

原來傻姨每2星期就會過黎食一次… 睇黎佢對小籠包真係好情有獨鍾….. 又係既, 平香港咁多…… 我地食左4籠小籠包, 一個小菜, 一客鍋貼, 一個擔擔面, 一個菜, 仲要…唔記得…. 埋單300蚊唔洗, 香港點得丫….. 唔怪得傻姨越黎越肥啦…..呵呵!!!!

食完飯, 梗係去東門shop shop佢……. 行到5點幾… 又坐車落去科學館站食日本鐵板自助餐… 今次揀左呢間"大漁"… 近期好hit既一間自助餐……150人仔任叫任食, 免加一, 酒水任飲…. 狂食左2個半小時…. 跟住就埋單走人返香港咯!!!!!

大漁最唔好係…. 鐵板燒既係哥哥, 唔係姐姐….. 眼福不夠……

好難得既2人合照….

用鐵板蒸熟隻蛋, 勁!!! 仲要勁好味!!!!!
 
去到7點幾, 已經勁多人…..成枱都係未熟既野….. 師傅, 努力呀!!!!

返到落香港, 我同爸b已經訓死左…. 靖天同婆婆竟然玩足成程車… 叫到成車人都聽到…  玩得咁癲既代價? 咪夜晚成晚都訓得唔好囉……

(161)

Comments

comments