靖天第一次發燒 (疑似禽流感?!)
真係好既唔靈, 醜既靈…….
BB發燒其實真係好平常, 只係過去一年黎, 心肝都未燒過… 打完針既退燒水都係攞返黎掉…
心中暗暗稱讚靖天叻女, 唔會發燒, 點知….. 呢頭諗, o個頭就小氣… 
星期六下午同佢去完公園影相, 夜晚出去同爺爺興祝生日, 席間都見佢好扭計, 精神又好似好差咁…. 以為佢只係太攰, 返到屋企沖左涼見佢又笑又玩, 諗住都係今日太曬影響左心情…
訓左後既靖天整晚都o係度呻吟, 又以為佢好似平時咁扭計想我抱住訓… 見佢唔係喊得好勁, 所以又未有為意….
直至到半夜三點, 準備上床訓覺, 摸一摸靖天: 點解咁熱既…. 即刻叫醒爸b攞耳機度體溫, 第一次度102.x度….. 即刻成個人醒曬…..
抱住佢抖左陣再度…. 101.7度…… 雖然有諗過會唔會訓左覺體溫較高, 但見靖天全身手手腳腳都慶合合, 都無乜可能唔係發燒……
發燒本來好平常, 只係…. 當日我地帶左心肝去公園既百鳥塔睇雀仔…… 
o個一刻諗: 唔係咁恐怖, 入一入去就賴野呀….. 
越諗越驚, 爸b仲問我洗唔洗入急症室…. 但又要嚇我話e生知道佢睇過雀仔一定要留院….. 
隔左5分鐘, 我地再度一度, 得返101度….. 所以就決定攞退燒藥俾靖天食左睇下退唔退到, 再決定早上去唔去e院…..
因為靖天未清醒, 灌佢飲藥水就難上加難, 仲要俾我聞到o的藥水好似好苦…. 半夜三更…. 唔知隔離屋會唔會以為我地劏左靖天… 
搞掂曬之後已經係凌晨4點幾… 臨訓前再度, 100.5度…. 諗住心肝應該退到燒, 所以我地就小睡左一會, 五點幾起身, 一摸心肝已經知佢退左燒…. 所以就繼續訓多陣…..到十點幾靖天訓醒, 又不停咁o係度呻吟, 扭計, 抱到係咁喊… 見佢好似又慶慶地, 又係咁流鼻水同咳… 所以決定同佢出去睇e生…. 
出到去e生話佢無發燒只係病毒感染喎…. 不過….. 其實都係時候要幫靖天轉個再好o的既e生…
劉e生開始有少少似熟賣熟, 好多野都開始用個肺黎講… 
平時傷風咳我都算, 今次靖天發燒, 仲去過睇雀仔, 但到我問佢算唔算感冒, 佢又話係病毒感染…. 問佢點先算係發燒或者需要入e院, 佢竟然話: 我話無事就無事, 你想知有無事你帶佢出黎見我, 我唔收你錢…. 
大佬, 家陣我唔洗做住你診所隔離咩… 話睇就睇…
計埋退燒水有5枝, 唔知係咪太苦, 今轉靖天食親藥都喊到甩左個肺咁濟….
返到屋企, 靖天又燒過….. 又係100 – 101 度咁游來游去…o的藥佢用黎噴多過食落肚, 真係好擔心, 佢要搞幾耐先會好….. 
不過爸b話應該唔關o的雀仔事啊… 可能去公園熱一熱, 又焗一焗所以感親下…. 但係我知佢都係安慰我, 佢心入面, 可能仲擔心過我….
如果靖天真係感冒, 其實我係咪做錯左… 一直都好抗拒幫靖天打流感針, 點知一踏入春天, 心肝就病了….. 實在係有點兒難辭其咎…
令一方面因為靖天o的燒慶下又唔慶咁, 又會諗會唔會係出玫瑰疹… 雖然知道呢隻疹係近年新興, 殺傷力亦都唔大, 不過…… 梗係唔出好過出架啦…
靖天, 幾時唔發燒呀? 快o的退燒啦, o的退燒水好苦架……..!!~~
(475)
我一見言言燒過 37.5度就會比藥佢，如果再興d會同佢著少d衫幫佢散熱，bb 有時會發骨燒，只要控制到體溫，唔好太擔心，你都要好好休息，唔係邊有精神照顧靖天喎！
我都冇幫一一打流感針ar! 百鳥塔我個次都係經過,唔敢入去! 有人話tst有個e生叫馬國超e生好wo!
如果覺得醫生唔係咁好 .. 轉轉醫生啦 .. 聰兒睇元朗個個都好 ok ga ..你有無興趣 ???
Hope 靖天 get well soon
方卓明醫生 ; 有看過嗎? 他每次都解釋得好詳細的
嗯……Sorry，你附近我唔係太知有咩好兒科醫生，等我幫你問吓屋企人，晏ｄ覆你喇！
ayia, 希望靖天快 D 好返啦, 媽媽唔好咁擔心~
我禽日喺海濱公園, 幾猛太陽, 都熱熱地呀~
大人都覺辛苦, 小朋友可能真係焗 OR 曬親都唔定…..
希望靖天快啲好返啦!!
轉醫生啦！大人發燒都辛苦，更何況小朋友更可大可小………
你唔嫌遠不如試吓睇（大埔～張志強醫生），佢睇兒科好好ga，我姨甥仔都係睇佢，我同亞妹細細個嗰時睇佢睇到大ga……你唔好咁擔心，小病是福，小朋友間唔中係會病吓！
祝靖天快ｄ好番，活潑精靈再同媽咪爸Ｂ去街街
謝謝你啊…….
多謝tammy既介紹啊……
不過大埔真係巧鬼遠啊, 有無o的近少少架? 嗚嗚
嗯嗯, 靖天好返少少喇, 謝謝有心啊!
要麻煩你喇, tammy~~~
實在太有心喇~
元朗既叫什麼名?!
無啦……等我搵下資料先, 謝謝聰媽~
嗯嗯, 托賴靖天好返好多喇, 謝謝!
荃灣我都嫌遠, 仲要出到tst………. @.@