靖天上學了@ 蒙特梭利親子班 第4課
記憶中, 今次係第一次同靖天上playgroup, 上到喊……
今堂如我所估計, 唔係Ms Daisy, 而係令一位導師Ralph Yau – 邱振明.
由今課開始, 家長們就要坐埋一邊, 齊齊觀察, 齊齊討論, 齊齊分享, 而小朋友就要學習如何獨立…..
課後買左呢個小教材, 不過首歌都唔識唱…….. 點算好?!
一如所料, 靖天初時都還可以自顧自的走來走去, 好快佢就成日走埋黎, 想我抱, 想痴住我….. 我要聽老師講野, 又點可以抱住您同您走來走去呢?!
記憶中, 靖天係全班最常走埋黎既一個….. 
老師先個別問家長小朋友既情況, 再齊齊討論…..
靖天今日唔再走來走去, 反而搵到呢個corner o係度搵o的小玩具
講及靖天時, 大致上都係一o的已經知道既野……….
當我分享如何處理靖天脾氣問題時, 解釋無再堅持由佢喊45分鐘, 一個鐘先抱佢, 係因為覺得靖天受不了這種教法 (參看另類教女法幾篇文章) …… 但邱振明反話靖天坐在床角自己一個係發洩情緒行為, 我地應該隨得佢, 發洩夠就沒事……
靖天初上堂的情況
當然, 這一點我是絕對不認同的!!!!!! 
靖天:『阿蛇, 你唔識就唔好亂講啦!!!!』
臨下課前, 邱振明再向我講, 靖天脾氣不好, 是因為身體不好, 見佢個子比較小, 面色也較差; 因為佢身體唔好, 所以先會咁容易有脾氣. 當我解釋佢不大肯進食固體, 邱振明亦反駁因為佢身體唔好, 所以先唔肯食野…… 其後仲介紹左個中醫叫我試下…..
又係左摷摷, 右摸摸
好意, 是接受的. 
但他一而再, 再而三的話靖天身體唔好, 我就絕對不能接受!!!! 
臨走前, 佢仲要話埋我呢個媽咪身體都唔多好, 叫我一齊去睇埋中醫!!!
呢度, 我想講:
我係成年人, 我身體差唔差, 用不著你呢位沒有執業資格的蒙特梭利老師去批評!!! 你話我身體差之前, 係咪應該先問我每晚幾點訓?!
每日休息幾多小時?! 小大便是否正常?! 一日飲幾多杯水? 有否特別病痛?!
我睇中醫已有兩年多, 我絕對相信我中醫同我講既, 多過你的一句” 我身體唔好”! 我幾時睇過e生, 食過咩藥, 相信我比你清楚幾萬倍! 
唔好望住我一副殘樣, 一對深深的黑眼圈, 或者係乾乾既嘴唇, 就斷定我係身體唔好!!!!
食無定時, 每日半夜無2-3點都唔願訓, 第2朝8點幾起身返工, 夜晚返黎湊女跟住上网, 咁既生活, 我相信唔係我身體唔夠好, 係我生活唔夠檢點!!!
如果你係咁有料, 當我問”你又知”既時候, 你就應該拋拋書包, 而唔係答我”我一望就知”呢幾隻字!!!! 連中醫最基本既望聞問切都做唔齊, 就咁肯定我身體唔好, 你有無病?!
做蒙特梭利老師, 係咪要做到你咁主觀, 先叫成功?!
講返我心肝 – 其實靖天身體差唔差, 唔到你去咁堅定咁批評!!! 無可否認靖天每個月都去探劉e生一次, 但十分Touchwood, 每次都是小毛病, 流流鼻水, 咳咳兩聲, 發燒亦只是試過1-2次, 我等已視作”小病是福”.
靖天:『我個子細小, 但我很聰明耶!!!!!!』
面色唔好?! 食得咁差, 你想佢面色有幾好?! 再者, 我由細到大都係面青青 (中學更比老師問我其實係咪吸毒點解面色可以咁差….) 可唔可以俾佢似左我?!
唔食野因為身體唔好?! 係因為唔食野, 所以身體唔好, 唔係因為身體唔好, 所以唔食野!!!! 唔該邱老師你搞清楚一點!
靖天的上課情況
再者, 我女兒出世較輕, 個子比較小, 就因為身體唔好?! 會唔會太主觀一點?! 呢個世界總會有人高, 有人矮, 有人肥, 有人瘦, 係咪瘦人身體一定差過肥人?! 請問你識唔識”尊重差異“四個字?! 
唔好因為我個女既面色, 同埋個子大小, 就令你覺得佢身子唔好! 你連摸都無摸過佢, 單憑佢外觀就話佢身體差, 所以脾氣唔好… 我真係好想問: 你個蒙特梭利牌, 係點考返黎?!
要反駁靖天身體不好的學說,
十萬字也寫不完……..
誰有興趣聽我偉論, 不妨告之!!!!!
===================================================
點解咁激動? 會唔會偏激左?!
因為呢位老師一而再, 再而三咁當位全班家長話我個女身體唔好, 咁…. 你係咪想講, 我湊得個女唔好, 先搞到佢身體咁差?
知唔知我曾經為左靖天出世既磅數喊過無數次… 亦曾經因為呢樣野, 差點兒搞到產後抑鬱?
作為一個媽咪, 陀佢, 生佢, 養佢, 然後俾一個不相干既人兜口兜面話自己女兒身體唔好, 仲要零根據, 可以唔激動麼?!
呢位老師既一番說話, 已經再次揭開我以為好返, 忘記左既瘡疤!!!!! 因為過去咁多個月, 已經唔止一次e生, 姑娘, 朋友, 親戚, 問我點解女兒咁細子, 靖天係咪早產… 答, 也答到我口臭吧!!!!!
我絕對介意點解靖天個子細小, 好似永遠都長不大…… 但係我可以點?! 俾肥仔水飲? 唔食野就塞到佢食?! 正如靖天的兒科e生所講, 食, 迫唔黎, 亦都看不到靖天有什麼有病痛… 唯有多點耐性, 慢慢來!~~~~
唔係個個家長都受得了俾人兜口兜面話自己個寶貝身體唔好, 你可以話靖天脾氣差, 專注力低, 但絕對唔可以批評佢既身體, 因為你唔係一個專業治療師!!!!! 無根據既說話, 講左, 除左會傷害人, 亦都會造成好多好多誤會!!!!!!!!!
如果我無端端同你講, 你對仔女又矮, 又瘦, 皮膚又黑, 身體好似又好差, 胃虛脾虛, 活動力又不足, 你會點?! 你斷唔會笑笑口同我講: 係呀係呀, 我對仔女就黎唔得架喇?!
最基本既同理心都無, 餘下既幾堂, 我仲點跟你學習?!
===================================================
課後, 佢細細聲走埋黎, 同我講, 話有家長反映唔好將佢地小朋友既樣子放上youtube, 同埋唔好有老師既樣…..
翻查過所有放上网既video, 無一條片係錄住老師個樣, 唔該, 你無見過, 就唔好話我做左!
再翻睇, 部份video (除左一條片), 係有其他小朋友既….半個人頭, 遠鏡, 過鏡…..
我唔知道該家長係睇左此2個blog發現, 還是直接上左youtube見到, 但呢度想講一句: 我係唔會將已上載既video 刪除!!!!! 因為我絕對無刻意去拍低你地既寶貝! 而我亦都唔會因為機構老師一句說話而唔再分享我心肝既成長小片段!!!!!
如果你真係感到好不安, 怕人地見到會對你寶貝不利, 你大可以親自留言, 電郵或者下次上課直接同我講, 我會搵返錄低左你寶貝既片段加密再分享! 請唔好同老師講完再由個老師講返我知, 因為咁樣我覺得係極度唔尊重!!!
咁簡單既野都要”話俾老師知”, 會唔會有點兒那個?!
上堂時就”笑笑口”, 原來課後俾人”篤背脊”…..
咁既感覺, 實在不好受!!!!
===================================================
我唔知道有關機構會否看到此blog, 或者會唔會又有人”話俾老師知”, 但我只想同朋友們分享我既感受 (或者有朋友會唔覺意安慰下我麻, 呵呵!!), 寫卜本身係好個人既事, 可以批評, 可以分享, 但一定係要同當事人講!
過去一段時間識左咁多朋友仔, 其實部份細心既朋友仔都知道, 我絕對是一個不好惹的人!
我從不說自己臭四, 因為我一直都係, 現實生活識我既朋友, 10個著左9個都怕左我…..
我可以在深圳大街為左當年年紀尚小的弟弟跟一班湖南人當街吵架, 要勞動到公安出動….
我可以為左小小的表弟給打尖而跟一位超級有”教養”的媽咪理論, 而令到成個小巴站既人都望住我….
我可以為左小小既利益而與某服務商爭拗個多小時…..
連奶奶, 都曾幾何時話我係一隻鐵咀雞…..
這些醜事絕對不值得炫耀, 我只係想帶出, 我絕對不是如其他网友般說我是一個稱職媽媽, 一個能幹媽媽, 十分佩服我的毅力等等…..
其實我一樣會說粗言, 會動氣, 也打過靖天…..
只是在教育靖天的同時, 我也在調教自己…..
然後…….. 如果有人有意或無意跟靖天過唔去, 我是絕不繞恕的! 那理他/她是一位校長, 名人, 老師……
===================================================
很反感吧?
反感, 就以後不要再來, 『咱們仨』也樂得清靜!!!!!!!
一個極度小氣, 無品, 無教養既女人寫卜
其實只係想搵人奉承自己
得閒讚我個女好靚, 好叻, 好醒…
又或者唔覺意話好索, keep得好好…
什至係讚爸B影相了得…
信? 唔信? 句句真心說話耶!!!!!
唔該…..曬!!!!!!
極度憤怒的靖天媽咪
2 Apr 09, 黃昏
(1345)
我想同你分享bb胃口問題.
我個仔16個月, 佢係細粒bb, 之前有1-2個月唔食正餐, 只係食奶同水果. 有時會只係食肉或菜, 唔d starch 都唔食. 人又瘦咗好多. 面青青.
後來, 我問一個朋友(素食者, 佢有一個都係16個月大嘅bb) 可以食咩好. 佢教我煲蘋果+無花果+南杏, d水可以飲, d果可以食. 仲有, 我會用煲熟嘅淮山+蓮子,用blender打碎嚟煲飯, 結果有好轉!!! 胃口好好, 面色紅咗, 又肥返d tim! 試下啦!!
On the other hand, I have been to the parents course, 佢地眼光都未係好全面. too absolute. 只有真理是absolute, 非真理範圍嘅論點要有support and explanation. If u read their articles in ICW web, u may find that it is too general.
又會咁既 … 上都上得唔開心呀 ….
我今日第一次睇你個blog就睇到你咁鬼火啦~ 笑鬼死我~
Blog 係一個好私人既地方. 鍾意既就交流. 唔like既就自動 out. 你果個亞sir 係唔係傻架, 係我心目中既靖天同學. 係全班之冠. 咩野都叻過人. 你話佢細粒. 敏搖仲細粒啦……我覺得無為同人比較. 自己覺得自己既寶寶快樂成長就夠啦. 係咪? 比你估下我係邊個先(真係無聊:p). 我都係你同學仔黎架.
同埋想講你都同靖天報幾多playgroup架喎 @-@
唉……當我睇見你寫有人話你心肝身體唔好既時候,我都好明白你既心情……我個女一出世有成8.5磅重,見佢肥肥白白梗係開心啦~但到左而家差唔多15個月喇~連20磅都無,得19磅…….個個見到佢都話瘦,講到好似我呢個做阿媽既無俾過餐飽飯佢食咁(最慘連我阿媽都係咁質疑我)…講真,我個女好為食,而且食量都ok,但唔知點解一直都係瘦猛猛,脾氣又差,成日只係識講bb話,d人就話佢蠢~~
不過,人地點睇我地都唔由得我地話事,雖然係會介意,會唔開心,但係每次當我個女一行過黎對住我笑既時候就咩唔開心都會無晒lu……
做媽媽呢個學問係永遠都學唔完,只可以不停累積經驗…..唔好俾自己咁大壓力呀!加油呀靖天媽!!^^
我都估唔到這些話會出自一間咁有名氣的導師!! 如果唔係你講出來, 都有人信… 如果係我, 我當時會即刻同學校講, 我要退學, 全因你們有此名大導師!!
係你先忍到, 我就真係忍唔到, 因佢一而再, 再而三咁講…
你唔好唔開心啦, 所謂上等人唔同下等人計較!
個導師可能 (我估) 見你唔認同佢O既講法 (隨得佢發洩夠就沒事), 所以是但搵樣O野O黎 challenge 返你O姐…如果唔鍾意上堂可唔可以退學費?
我都明白自己小朋友比人惡意批評做媽媽有幾難受…我個仔出世時都係未夠 6 磅…小朋友肥瘦都唔緊要, 其實身體健康身心正常就 OK…唔鍾意聽O既說話咪當聽唔到囉, 你知道自己鍚個女就已經足夠~
Don’t feel upset. I also have a daughter and I understand it’s never easy to be a good mother. Add oil, you are a good mom :)
佢兩個係老闆?老闆又點? 而家係講緊佢專唔專業問題嘛, 咁身為家長(消費者), 有疑問係咪可以有權發問先? 佢都應該認真解答你囉,但佢所講好似真係得個講字喎,單憑外表就簡單去下判斷,係唔係可以將佢所講0既教學知識0黎個質疑呢??同埋如你所講,佢都唔係醫生呀
唉, 我上完仲以為你會同我一樣覺得”終於都有D野聽下喇, 唔使好似返到去無無謂謂”咁既感覺, 點知佢竟然俾D咁既評論你… 換左我係你我都會好唔開心… 做人亞媽仆心仆命, 又多野諗又多野擔心, 仲要有時有心無力個種痛苦真係… 唉~
無論點都支持你, 你對靖天既努力同付出一定會有結果! 加油!!
TO: 超, 1902, bkmami or (maybe the same one)
我都唔明, 你地連最基本嘅禮貌同尊重都唔識, 點去教人同批評人呀?? 我相信每一個母親都比任何人疼愛自己嘅仔女,好與壞,干你屁事!!有時間, 唔該你地自己返去重新學習吓D家教啦~
我自己係護士, 都未必可以控制到自己嘅飲食同健康.所以靖天媽媽, 我覺得你根本唔洗理會人地廢話, 每個家庭都有自己嘅一套生活方式, 根本不可一概而論.尤其係嗰個一D都唔專業嘅老師~
睇你個BLOG咁耐, 知你好鍚靖天…我支持你~~
feel倒您既心情呀, 但唔需要為呢d亞蛇勞氣啦. 呢個社會大把呢d自以為是既亞叔呀.
我覺得寫blog最緊要係真心, 所以我好鐘意睇您同靖天架, 有o個句講o個句.
欣賞你嘅直率，敢言！看不起一ｄ斷章取義，做事不光明磊落嘅人！！撐你！！
bow, 唔知點講好~ 總知就係想叫你唔好唔開心, 唔好為佢地而激氣, 亦唔好為佢地而唔 upload movie >.< wakakaka
我亦覺得, 你唔係一個不好惹的人, 因為唔係你o既問題, 相信每個人遇到你呢個情況都唔會好受, 一定同佢 “併” 過, 所以…我唔會唔睇你o既blog….
支持 x 10000000000
車車車…物以罕為貴…小留言比你, 你見到咪開心law~hoho!!!
靖天媽, 唔使嬲到訓唔著 wor…… 敏堯成日比人話面青青啦, 我係唔會理佢地, 關佢鬼事咩…… 最多話敏堯學野慢, 而家15個月仲未識行……. 唔好理人講咩野, 最緊要自己一家三口開心…….. 你要記住, 你唔開心, 靖天會feel 到, 爸b又擔心你地…….. 唔化算呀…. 開心d….. 努力寫卜, 記低靖天既開心得意野…… go…..go…..go……
Wiow, I can feel your fire whiel reading your blog.
but let it be, don’t take it to heart and let such thing upset you. Look at your Ching Tin and you will foregt everything.
I have to say, you are doing a very good job taking care of ChingTin…better than many many mamis.
傻啦, 梗係無嚇親啦…… 明天見喇……
I used to read your blog without leaving you a message. But I think this is the time for me to minimise your FIRE!!
Don’t be angry! If Ching Tin is not bright, then Adrian will be a dummy! By attending the playgroup together, I noticed that you are a good mummy. To be honest, I think Adrian is skinny. But He is healthy. If Ching Tin is healthy, Fat or Skinny is not a problem at all. Come on, give us a BIG SMILE!! I still remember the BIG SMILE of yours and Ching Tin.
Let’s work hard in bringing up our loving kids.
BTW, when Adrian was born, he only weighted 5lb 13 oz. See, he is the one should be labelled as “BAD”! Not Veronica!!
把口生係人地度, 佢講乜你控制唔到, 不過你可以選擇唔聽, 唔係事實既野聽黎把鬼…
反而我覺得你好用心咁照顧靖天, 你可以又返工又要帶靖天去參加咁多playgroup, 睇咁多資料, 已經好辛苦, 我好佩服你架…
下次如果個老師再咁講, 我一定唔會留口咁吋返佢, 我都係一個唔好惹既人, 連我老細都忌我三分, 我比錢你教個女仲要比你講d咁既野, 慳d啦 (sorry, 唔好介意粗俗左少少)
好明白你的感受, 我個BB比較重磅, 尤由BB階段, 每次見我個姑仔(老公個妹), 都話佢”似欣兒”, “將來一定好餵食” 之類箭穿心般說話…我團火真係上到個頭度, 就算係都唔需要每次見面都要提一提, 難度你不覺得煩悶嗎 ??
.
她的女兒皮膚很克, 她倒讚自己女兒”黑珍珠” 的本末倒置說話……明白每個父母總是為自己孩子辯護, 我都沒多反駁. 只係心裡不好受, 為何每次見要總是要在人家傷口上灑鹽.
唉…你還好, 那個老師不喜歡就不見也吧 !! 我倒沒你的幸運, 家人不可不見…..不過由當時一次又一次的傷害開始, 我己經冇再同呢個人多談 !!!
真心為我好的批評我會欣然接受, 但有傷害性而又幫不上忙的……對不起, 我暫時沒有這般大方, 尤其是關於我的宝貝女…….其實, 我都唔好惹.
SORRY,留左個咁長留言, 因為見到呢篇, 我嘅感受同人一樣 ” 再次揭開我以為好返, 忘記左既瘡疤!!!!! ” 不過好開心, 可以係度發洩一下 !!
哈哈!!!你鬧得好,我BB都經常比人話細粒矮,又話唔識凑等….做媽媽听到唔好受,你講噶真系全部系我心声,你鬧完就會輕鬆D,比個D人看到就更好!!其实我之前都好似你緊,真系好唔開心,但系好快我就該变心态,用大無畏的心态回应個D人,系啊細粒矮似我啊嘛,点解仲未識乜,我就話是但啦到時就識噶啦再唔系你帮我凑咯!嘻嘻…我看咗11月啦唔該晒!!!
yes ah!!! He is now only 20lbs. If you visit our website, you will notice that Adrian is still very skinny. But so what??? Weight is not a sign to prove Adrian is dumb or not! If Adrian is going to over-weight, I would prefer he is skinny. Look better ah ma.
唔駛唔開心, 我都聽慣架, 成日話我細仔細粒(佢出世得2.59kg, 足月), 但只要我知我小寶貝係活潑好動, 我唔再為果d無聊人說話而嬲呀. 努力呀.
其實o個位老師講既野只可以作參考…
佢只係根據書本知識去嘗試解釋…
(我相信佢每個course只係得8堂…佢講既野準唔準…小朋友有無進步之類…佢地or佢本人係唔會follow-up)
但人人都唔同….佢見到靖天都未夠一個鐘就咁多comments..
似乎佢應該要從新學習咩叫觀察….
如果一個人o既行為俾你望十零分鐘就可以咁快下定論….
咁哩個世界就唔會咁複雜啦…
我覺得o個條友本身o既質素都係有問題……
表達方式亦都唔professional..唔應該係一個受訓老師o既表現…
有少少自以為係老師就好放肆o既感覺…
唔好咁嬲啦…個女你由未出世已經日對夜對…
邊有人夠你清楚靖天丫……
其實唔使太動氣…..反而我覺得你可以嘗試冷靜咁指出哩位老師唔professional o既地方(簡單唻講就係冷言冷語咁去寸佢…)
如果俾佢搞到喊…反而令人地覺得自己講得無錯…
係家長自己接受唔到云云…
同埋你真係應該要問佢….
身體差=脾氣差..
哩個問題究竟個邏輯係邊…
有無醫學根據..
如果無的話…有無心理學o既大型研究報告…
老實講..我自己就無聽過哩個結論.
亦都覺得同我認知既世界唔同…
更重要係你同你老細發脾氣…係咪可以話佢聽『我身體差…你要體諒..如果你炒我即係歧視身體差既人…我要告你』
有少少感覺哩件老師係吹水型…….
但唔係太prof…….
課程本身都少許搵笨…….
上baby buddies好似實際o的…..
唔洗理人講咩,明眼人一睇就知佢無料到啦,我0地亦知道你為靖天做過很多,我0地都有眼睇
同意呀,細粒無罪0架,彤彤咪一樣生得細粒,而家出街被人問夠一歲未…哈哈….好似已經過0左幾個月咯….人天生有高有矮,當然生得矮唔代表佢身體唔好,佢唔食0野都唔等於身體唔好,呢點係人都知啦,佢講bull shit啦,咪鬼理佢啦
我覺得反而要去complaint佢有幾專業就真囉,有根有據唔該你拎出0黎講,唔係單憑你一句話就話個小朋友點點點囉
咁縱容個女,將來有排你受呀!
有你咁ge阿媽,你個女盞成世都唔會獨立!整間溫室成世裝住佢啦!
依家d人咁攪笑既, 睇人地d野, 唔鍾意咪咪鬼睇囉, 你唔認同可以唔出聲, 亦都可以選擇唔睇, 人地又無叫你比意見, 踩得人地場仲要話人不是, 呢d咪就係”無品”囉…
(我無指明話邊個架, 自己對號入坐就你既事, 我純粹睇唔過眼咋…)
靖天媽,
一直很喜歡看你的blog, 看到你對靖天的付出和努力, 覺得你很棒啊! 你絕對是一位優秀的母親. 我一直都在向你學習. 加油呀!
咁細個就返學 …. 唉 … 來日方長,你驚佢第日無得讀咩?!
真係典型香港家長,驚死洩底,一味去谷小朋友做呢樣做果樣. 佢唔係馬騮呀. 為佢好既, 比番個快樂童年佢啦.
Dear PP
謝謝你的安慰………
抱歉, 要做個”有教養”的人, 太難了…….
其實再直率一點也可以, 只是不想太直, 怕嚇親大家…..
咁都得??????????? @.@
敏堯唔係叫面青, 係白白滑滑, 我同靖天恨都恨唔到……..
謝謝你, 給嚇親了吧….. 我對敏堯好溫柔架麻, 哈哈
哈哈哈哈~~~~
明天見喇….. 預祝兒童節快樂….
(唔知張姨姨有無糖請小朋友食? kakakakaka)
十分十分十分之憤怒……
呢兩日望住靖天, 也在不停問自己: 真的太瘦了?! 真的身體不好?! 心, 總會有一點點的痛
ANYWAY….. 謝謝你鼓勵, 我會再出力一點湊大靖天的
Dear CiCi
感謝你的支持, 火, 到呢一刻還沒有熄, 因為該導師實在踩得我好痛!!!……
為人父母者, 無人想聽到 (仲要當眾) 俾人話自己仔女身體唔好吧……..
靖天細粒, 但細粒無罪的!!!
如果面色不好, 唔肯食野, 發脾氣, 睡得不好, 就是因為身體不好, 那世上究竟還有沒有健康的人?!
不是吧……… tum我麼?
不過, 靖天出世得… 5磅10安士……
一直都keep住25%條線……
(還沒有跌穿生長線, 點知原來咁都已經係身體唔好了)
對, 控制唔到, 但難減憤怒…..
都嬲左咁耐, 仲係好嬲 , 一諗起就好嬲好嬲……..
爸B都話我好耐無嬲成咁了……
好一句”慳O的”, 我真的怕下一堂, 我會對老師這樣說. 嘿嘿
街坊街理, 不用咁客氣………..
你分享左一O的我睇完我扯曬火既故事…..
欣宜? 叫佢小心自己先啦~~~ 一日未死, 邊個知會快o的變成欣宜呢?!
黑珍珠? 不如叫黑人牙膏代言人?! 係咪型o的?!
我一o的都唔大方…. 家中多多少少都有親戚話靖天細粒, 但奈何, 我個子都比較小, 細個又醜樣, 呢個女, 已經比我好, 有進步了, 嘻嘻
多謝讚賞 (真的在讚我嗎? 嘻嘻!)
如果生佢出黎個個都唔識湊, 咁呢個世界唔會有”母親”二字吧?!
雖然我仲好嬲, 但多謝你既分享…..
細粒, 因為似自己麻……
細粒=身體唔好…..
我都係第一次聽!!!~~~
去必瘦站好貴架…..
做肥妹, 不如做個平胸小姐, 咁樣我仲安樂o的………..
只係我唔明, 點解個子小 = 身體唔好
會唔會有點兒那個?!
adrian 不似20磅啊~~~~
靖天情況跟你囝囝差不多啦
個子小, 但都不是太蠢太笨, 已經足夠了……….
小病是福…….
奈何俾人話身子唔好……….
師姐次次留親言, 我都心服口服…….
你o岩, 下次, 我識點”處理”呢位老師既評價!!!!!!
哈哈…… 你個例子好正啊, 師姐……
我以後都會記住…..
唔係咁想接觸多一點蒙特梭利, 都唔會報呢個班……
家長班失望
親子班仲失望…
弊在佢同Daisy Lau都係老細呢…….
com黎有鬼用咩….. @.@
謝謝你既留言啊, yy~~~~
彤彤不似一歲? 咁靖天真係要人道毀滅了……..
總會有o的為我囡囡抱打不平既人………
我同你都不要動氣!
咁好聽既說話, 我會完全接受, 今晚可以發個好夢. 謝謝
又係你呀?
點睇, 我個女都唔係溫室長大啦…….
再者, 有無睇埋內容先鬧?
我針對緊位老師無故話我女兒身體唔好, 並無其他用意..
你要針對我們, 都應該先理解, 再有理據才出聲吧?
咁點算呀? 我好驚呀~~~
溫馨提示: 如果閣下要分兩個名, 或者十個名黎教訓我, 都應該先看內容, 你從何見得我縱容我個女呢?! 願聞其詳
同埋用兩個名, 鬧類似既野, 都唔好爭咁短時間…. 咁做, 會太明顯的………
呢個係家長親子班
重點在於父母, 唔係個小朋友…….
先了解每個playgroup既性質, 再鬧吧!!!
再者, 用馬騮黎比喻, 並不洽當, 我完全唔明白迫個小朋友返學, 同係咪馬騮, 有咩關係?!
Thanks……. Eva~~~~
Will try my best……
質唔質疑佢…..
我仲考慮中…………
怕一發不可收拾
謝謝你, koko~~~
落堂見你講完我都好期望, 本來都好地地…..
點知中途佢無端端講句咁既野……
仲點會有心情上落下…….
Dear Macy媽
我無諗過會有人o係呢度為我打不平…. 幫我出頭
一早起身見到你呢個留言, 係十級感動…….
難怪大家都係大西北既子民, 哈哈~~!!!!
多謝你呀!
謝謝你……..
我無唔認同佢既講法啊, 嗚嗚…..
反之我仲多問左佢問題………..
我都想退返學費…. 不過呢度”超現實”不可行的!!!!
因為在肚裏太好食好住, B女出世要KEEP FIT唔做欣宜囉, 好事啊, 太肥, 要減肥, 你又會會好頭痕呢…
我唔介意囡囡細粒, 或者瘦小, 只係介意人家因為佢個小較小, 就話佢身體唔好………..
討厭!
唉……. 明知無得退學費, 我退學, 咪益左佢囉….. @.@
我又唔係上等人, 梗係要同佢計較啦
我仲會上埋餘下四堂, 篤眼篤鼻篤死佢……..!!!!!
嗯……….. @.@
這就是我真面目, 哈哈!!
我知你係靖天同學仔啦…… 唔係點會講到敏堯個名?! 哈哈
但你咁少提示, 巧難估喎…… 多少少提示得唔得呀?
敏堯先唔係細粒, 佢好明顯係高瘦o個隻啦…….
靖天矮, 又瘦, 然後俾人話: 身體唔好了… 唉;
dear grace
謝謝你的建議, 因為靖天大病初癒, 所以暫時只係食下粥仔或者麵包仔…. 你既建議我會記低, 淮山煲粥都有開始俾囡囡試了, 還好佢都肯接受… 希望明天會更好~
至於佢地既家長班…. 早前亦都分享過….. 感謝你的意見與分享