琴日終於重出江湖….. 去左秘撈~~~

前一晚已經訓得好差…… 又好緊張 (咁耐無返工…. 好驚返到去乜都唔記得曬)

凌晨5點幾仲餵左一次奶….. 跟住訓得2個幾鐘就起身…..拿拿臨搞搞間廠留少少儲備, 跟住就9秒9換衫裝身….. 事關個女一醒, 我就乜都做唔到……

跟住8點9個字, 搞掂自己, 搞掂囉去靖天婆婆度既用品….. 靖天就剛剛起身…..

然後我又用9秒9時間同佢換片, 坐暖枝雪奶…… 餵埋佢就出發喇!!

心肝好似識性咁…… 我一放佢落車仔就係咁喊….. 唯有同佢講我要去返工, 叫佢去婆婆度一陣, 今晚接返佢…… 點知都仲係喊, 好似好淒涼咁…….  真係心都酸埋…..

推左去婆婆度…… 咁我就坐車返工喇….. 上車一陣就訓到死豬咁……  梗係…. 琴晚2點幾醒一次, 5點幾醒一次…… 今朝起身又搞呢樣搞o個樣…..唔攰就有鬼…… 

出到中環都係10點3個字……. 11點先返工梗係唔會咁早上去啦….  咁咪去麥當勞食個早餐先囉….. 或者因為自己一個, 又掛住個女…… o的眼淚已經湧到去眼角….. 不停叫自己唔好喊, 唔係俾人以為我精神有問題, 食食下魚柳包都喊……  

成日個心都囉囉亂, 不停咁望鐘, 好想快o的收工……  又成日打返去, 打到靖天婆婆都話我, 哈哈…….  好辛苦捱到5點…… 又用9秒9時間執書包收工, 行去join埋爸b一齊返屋企….. 其實已經有好幾個月無一齊收工喇…..感覺好溫馨, 好回味…….

返到屯門, 去吉之島買左o的牛扒同埋壽司上媽咪度食…..

望到心肝一刻….. 真係百般滋味……

好難想像……下個月正式返工, 我會變成點……

(31)

Comments

comments