我無產後抑鬱!
我o的性格……點會出事喎………
話說琴日去健康院, 姑娘叫我填份問卷…….
點知填完個結果係”我唔係幾穩定”……. 
姑娘問我點解o係份問卷到答左咁多負面既野……. 咁我講o的唔講o的……. 講講下, 又喊喇…… 
自從生完之後, 真係少少野就想喊…… 好鬼無用….. 
姑娘話如果再持續落去, 就會有產後抑鬱, 叫我放開o的….. 唔好成日諗o的唔好既野….. 下? 2個月喇喎, 仲有產後抑鬱????? 
姑娘話產後抑鬱可能延至產後6個月先出事…… 唔係卦…….. 姑娘仲好搞笑問我有無諗過做傻事或傷害bb……. 啋……. 我死左個女點算呀? 
我咁辛苦生個女出黎….. 咁快整死佢? 我咪好戇居? 
其實來來去去…. 都係因為一o的野而觸發到我條淚腺……… 一喊, 就收唔到聲……
心肝一出世既體重就唔理想啦……..
(其實一直都好緊緊於懷…… 點解人陀仔我陀仔, 我足曬40周先生個女, 就咁輕…. 人地早產o個o的, 個bb仲重過我個女….. 係咪我做錯o的咩, 令到靖天一出世就咁輕….
自己既彩虹牌供不應求, 令到心肝要食奶粉啦……
全人奶一直都係我既目標, 點都無諗過, 自己會咁快就唔夠俾靖天…….. 雖然奶粉唔係毒藥…
. 雖然姑娘已經讚我好叻, 返左工都餵到人奶, 仲重得咁理想…..但心入面仍然係好在意….) — 所以從來唔會對外人講自己點餵點餵, 因為我真係會一講就喊…… 我都唔知點解~~~
要返工, 成日唔o係靖天身邊…… 好怕佢唔認得我唔要我啦………
由最初出院佢只係認得我把聲, 我抱佢就好乖咁訓覺….. 到今日靖天已經大個女, 唔再痴住我一個, 人人抱佢都ok…. 其實o個種感覺真係好怪……
我好怕好怕好怕, 有一日我地會變得陌生, 佢唔再屬於我…. 人地o的媽咪可以放低自己既bb成個星期先湊返佢, 我真係做唔到….. 姑娘叫我放開o的, 唔好成日諗住個女….. 如果我得, 我估我會開心o的….. 但做唔到~~~
因為某o的原因, 我好珍惜呢個女兒….. 係外人不足為道…… 更加慶幸我話要, 就有…. 所以更加害怕失去…… 就係因為咁, 我要俾最好既野佢, 要縱壞佢, 將所有注意力俾曬佢…. 如果有一日, 佢唔認得我, 唔痴我…… 好難想像我會點……. 
我成日覺得, 自己既性格, 唔可能會有呢o的情緒病, 因為我乜都講, 咁講左就無事架啦…….
但似乎, 講完又講, 我都係咁……… 係咪真係返左工好o的?! 還是會更差?!
就因為咁…… 兩個月後, 唔止靖天, 連我都要見姑娘…….. 唉~~~~~
(189)
唔她諗咁多, 比心機搵錢, 比心機揍大靖天, 將最她既野比曬佢, 佢一定feel 到既, 加油!
女生外向丫麻…….. 我怕架~~~
maggie:
你同我一樣下星期返工喇~~~
都唔知點算……. 頭先落機我好似趕住去死咁….. 橫衝直撞……. 哈哈~~~
你唔好諗靖天唔認得你啦，我有個朋友信佛既，佢話你唔好諗bb係你既，佢只係返你比功德你或者討你債咁樣個心會好d架，你諗下我日日對b既時間都唔夠我奶奶多，但佢都一樣認得我架!
唔好成日諗埋一邊啦~你會開心d架~希望你去完旅行返舨開心好多啦
明白你的感受, 到依家我都好介意點解哲哲唔多so我, 下星期一就要比人湊哲哲, 而我都開始要返工, 我同你一樣擔心, 怕哲哲更加唔認得我, 但…life must go on, 我相信我地真係拎個心比自己既仔女, 佢地遲早一定感受到, 會好愛我地
開心d, 放鬆d, 靖天都唔想見到個成日唔太開心好憂心既媽媽ga ma, 笑下啦
靖天媽媽，你要開心d呀！靖天囡囡
雖然而家靖天bb體重唔係咁理想，健康咪得囉，正面d嘛！
雖然你而家要開始返工，同囡囡見面少左，靖天知道你要搵錢養佢，佢又點會唔記得媽咪呢，放心啦，靖天出自你肚，點都血脈相連，唔會唔痴你。靖天：「到時我識行識走，都痴住你，到時我識講野，不停同你盡訴心中事，你會唔會嫌我煩咖？」
比啲正能量你先~
傻瓜 (唔好怪我多事先)
唔好唔開心啦,我好多朋友都話出世重,大左反而輕,出世輕,大左反而重tim!
第二,你已經好叻叻啦,餵左好耐,唔好俾pressure自己!
第三,錫自己仔女係應該,想俾最好既野佢都係正常,但縱壞佢, 將所有注意力俾曬佢,可能真係害左佢架!凡事物極必反,到時個女可能怨番你轉頭!我由十個月到小學3年級都係GRANDMA湊,MAMMY一星期先探到我一次,我未一樣最錫個個係MAMMY,始終你至係佢既親生MAMMY MA!!
我上次聽講座話可以去到2年都可以有抑鬱架!
傻妹,我個女出世足月咪仲輕過你個女,當初我都有怪自己,但係而家見到佢長肉又肥左,唔好再諗之前啦,靖天咪長得好好囉, 你d彩虹牌咪好好囉!唔係靖天點會長得咁快呢, 係咪先!
仲有呀,返工為搵食冇辦法0架, 佢長大左一定會明白你為工作, 講真, 我夠想唔做湊女啦, 但真係要搵食冇辦法呀!佢點會唔認得你呢!你把聲佢聽足10個月, 你個肚住足10個月,對你一定有感情0既,放心啦!
不過你真係要放開d,唔好擔心太多,開心d, 第2時做個好榜樣俾靖天睇嘛!
我會架喇……… 真係好羨慕你可以做個全職mama!!!~~