難以接受, 老是說自己是「公主」的靖天, 會愛上這條… 鬼東西!

某天晚上, 跟傻姨一起外出晚飯,

飯後到反斗城逛了一圈,

忽然, 靖天拿著一條鱷魚: 『我想買呢個呀!』

媽咪被這麼一條不大不小的玩意嚇了一跳: 『嘩! 你邊度攞架?』

靖天: 『我唔知呀… 頭先見佢o係個地下度, 咪攞起佢囉!』

媽咪: 『….. …… ……. 』

結果, 成全她的, 當然是最愛她的傻姨…..

只是…

這條鱷魚玩具, 找遍整個店子都找不到另一條, 而且靖天手拿著的這條, 沒有bar-code, 沒有價錢…

因為靖天嚷著要買, 結果, 就勞師動眾的找職員查完又查….

弄了差不多15分鐘, 最後將鱷魚先生確定價錢為$99!!!

.

離開店子, 媽咪狠批: 『又大又硬又肉酸, 睇您玩一晚就掉左佢丫!』

靖天反對:『哼! 我唔會架!!!』

然後, 靖天又問: 『佢叫咩名呀?』

媽咪: 『我梗係唔知啦, 您幫佢改一個啦~』

靖天: 『唔~~~ 不如叫晴天鱷魚啦!?!』

媽咪心想: (這是影射我嗎?) 『唔好!!!! 』

靖天: 『咁叫咩呀?』

媽咪: 『嘻嘻~~~ 不如叫小昌子啦!!! 佢係男仔黎架麻!』

靖天:『好呀！就叫小昌子啦!!』

凌晨, 媽咪忙完, 要睡了…

進靖天房間, 奇怪被子放到床上?! 那她自己蓋什麼?!

細看, 原來靖天將”小昌子”放到床上休息, 還幫它蓋被子!!!!????

這才想起, 回家前, 靖天問媽咪: 『我今晚可唔可以同小昌子訓你張床呀?』

媽咪: 『唔得! 我都唔鍾意同鱷魚訓既, 陣間佢咬我點算呀?』

靖天沒有”偷雞”, 也好好的安置了她這天的最愛….

.

第2天出門,

天氣冷, 又在下雨,

出門口前, 靖天竟然偷偷的將小昌子抱在懷中,

媽咪開始火了: 『您做咩呀?』

靖天: 『我想帶埋小昌子去睇我跳舞呀!!』

媽咪: 『唔好啦… 出面落雨, 帶隻咁既野好麻煩架!』

靖天: 『唔緊要啦, 我會照顧佢架!』

媽咪: 『你話架! 我唔幫你攞架…』

靖天: 『嗯! 咁我幫佢帶把遮先!』

媽咪: 『無架!! 唔洗帶遮架!!』

靖天: 『下?! 咁佢咪會淋親囉?! 陣間淋病點算呀?』

媽咪: 『……. ……. 鱷魚係唔怕落雨架… (下刪百次解釋鱷魚是兩棲動物)』

最後, 靖天還是緊緊的攬著她的鱷魚先生, 怕它淋親…

媽咪沒她好氣, 二話不說將她的鱷魚放進她的懷中, 用她的雨衣包著, 靖天開心得由心笑了出來, 還連聲『多謝』媽咪!!!

走到馬路, 媽咪說: 『捉實你隻野呀! 陣間跌左O係馬路我唔幫你執架!』

靖天: 『咩我隻野呀?! 佢係我隻寵物黎架!』

媽咪: 『你咪癲啦! 邊有人養鱷魚做寵物架!!』

靖天: 『點解唔可以O者?』

媽咪: 『 (沒氣了!!!) 你話得就得啦……』

.

快到車站, 媽咪決定戲弄女兒一下…

媽咪: 『哈! 你死喇! 寵物係唔可以上車架喎!』

靖天: 『下?! 點解呀?』

媽咪: 『佢係寵物黎架麻, 陣間佢咬O的乘客點算呀? 寵物唔可以坐交通工具架!』

靖天: 『下?! 咁我點算呀?』

媽咪: 『無架喇, 你行路啦, 陣間有車我就上車架喇!』

這時, 車來了……..

媽咪: 『一係你掉左佢啦, 咁咪可以上車囉!』

靖天: 『唉… 好彩小昌子係玩具黎咋, 佢都唔係寵物, 咁咪唔洗驚囉! 我地可以上車喇!』

還要跟她的鱷魚先生說: 「唔洗驚呀! 我地可以上車架喇!』

媽咪: 『你頭先話係寵物黎架?!』

靖天: 『我講下咋麻…』

.

媽咪本以為靖天「新屎坑」,

已經快2個星期, 靖天熱情是減卻了, 但卻每次外出都嚷著要帶它的鱷魚先生…

爸B媽咪開始習慣了,

難得靖天走到街上, 也沒有因為要逛要玩而忘記她的「小寵物」….

快5歲的靖天, 看管自己的物品, 真的上心了, 小心了!

.

(84)

Comments

comments